نصوص جديدة للشاعر المبدع (( رياض النعماني ))

**إشارة** : تمثل هذه النصوص الجديدة للشاعر المبدع (( رياض النعماني )) قفزة لا في أسلوبيته الشعرية الشخصية حسب بل في مسار الشعر العامي العراقي أيضا . هنا سنواجه صوفية جديدة .. صوفية الجسد الذي يتحول إلى حروف ومفردات سماوية .. هنا يستثمر الشاعر اللون والضوء ومفردات الطبيعة بروح تحرشية .. روح شاعر تأله وهو يشكل كونه الشعري الباهر .. وراح .. أو ضاع في غيبوبة متصوف أسكره الإنجذاب إلى الواحد : الجسد بتجلياته السماوية الباذخة..
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

riad_alnomane(( جسمج ))
—————
نسيم
وشمس خضرة بالمطر
والمكحلة .. والمزهرية .. والجراجف نعّسو
ويلالي
جسمج : طيف
جسمج : ضوه لآلاف النجوم
و مي صبح بالصيف
أنظرله .. ويشف .. يشف
جسمج :
من يجي ويروح
يترك زفّة آعصافير بين اثنين
يترك ضجة بالدنيه ….. تظل سنين
ساكت … 
وبسكوته الوردي كل شي يكول
جسمج :
يترك الصيف اعله باب البحر … وج مذهول
يسرق موج …. ويهرب
ينزل بالوحي ….. ويكتب
….. ويكتب
بالأزرك البحري ..
ويشعل المشمش ….. ملايين القناديل
ابمواني غربة العالم
يجي ….
والبرتقال يغيم … ويعطّر ضباب
ويمطر …. ويمطر … صحو
وينسى الصحو
……… ينساه
جسمج :
ياخذ المعنى لضوه الروح
ويراويه وجهته ومعناه
ويتيه وياه
( 2007 )

(( إكعد للنهر ))
—————–
إنسى كل الكتب
كل الّلي تعلمته .. وعرفته انساه
وتعال إهنا … كبال النهر
لو … وردة
انحني ليها وتأمل الأسرار
الماقبلها ….
ولا بعدها اسرار
إكعد للنهر :
لامس بروحك لونه الأزرك
واملي إيدك من هديله .. ومن هواه
إسمع سكتّه …
وصفنته
وموجه … وغناه
الوردي … راح اتشوف روحك
راح تعرفها … وتحبها
اتضوكها … وتمتلي بيها
واليضوك الروح … ويحب بيها
راح ايصير هوّ النقطة تحت الباء
هوّ النشوه …
لو راد الخمر ينتشي
هوّ الجهة اليتوجه إليها الكون
هوّ الّلي يسمّي
ويكتب
ويمحي
وتدور إعليه الأفلاك
ومثل ما يشتهي هوّ …. ويصير
إيصير
ويتحوّل إله …..
(16/1/2007 )

(( إلى أدونيس ))
——————
إله الأسماء كلها
وهوّ حاضن وحدته وابعيد … يبقى ابعيد
بين الناس يمشي اوحيد
شايل وحشته .. ولابس سواده
العالي … يوم العيد
يرعى العزلة بمفاوح غزالة
راكضه بورد المسيح
والصبح … تترك من حوافرها عرس واملبس وكمره
وصلاه …
ترفعها أرض الفرح للحب
شكرا لهذا البياض الأزرق اليفتح
على الباب الوحيد أبواب
ساحر غيّر الأسماء والأشياء
وأحبابه الكتاب
يفتحه مثل كتاب
هذا النبي الحاضن بين إيديه
فجر النبع والعرب صحرا
العرب ترميه بحجر
جرحه بجبينه
والصلاه حطته قبله وسوّته
و ( رسمته ) محراب
فوك ايده الكلام يهب فراشات
وضوه طايح من اخدود الفواكه
على شذر ورنة الخلخال
روحه امرايه … والغبطة عليها هلال
يا ما خلق … من البرق ؛ شرق اجديد
سوّه بنظرته المعنى معاني
ومال واكف … مال
هذا النبي ، أحزانه وغربته اطوال
…….. حيل أطوال
( 2007 )

(( ؟ ))
————–
إسْ …
لا تجرح العتمه .. وإحجي بهمس
مثل اللي يشم بالحلم نحر الضاويه بليلة عرس
و..إمشي
لتمشي
لا … لتمشي … طير
فوك الكاع
رِف …
غيب بهوى العتمه الخفيف الصافي
صِير إنت الزجاج وشف
وين المعنى ؟؟
: بالعنكود .. لو .. بالكاس .. لو .. بالخمر ؟؟
لا .. مو بالكل
لا … تسأل
العاشق … على باب الحضره يسكت
والسكوت الأبيض العالي كلامه
ريحة الألوان
والشباج
وأنوار الذهب بيته ومقامه
والمقام إيطوف بي بأعلى غرامه
_ _ _ _ _ _
_ _ _ _ _
شوف عطر الخصر يتنفس
وشامات الضوه فوكاه مرشوشه
وهوى الشباج
ينزل فرح فوك اضلوعها
من ضلع ينزل لآخر
ويمسحهن بريشة حمامة
بس المعنى وين ؟؟
المعنى بيمن ؟؟ … بالخمر ؟؟
لو بالعنب ؟؟
لو بالزرع ؟؟؟
لو بالخلق ؟؟ .. لو .. بل …
لا … مو بالكل
المعنى ؛ لو وصلته إنساه وإمشي إلغيره
إمشي
ولو وصلته … إبغيره إمشي
المعنى من تعرفه ينهي … وينتهي
إمشي برذاذ الضوه … بورد اللون
غمّض عينك
وأنظر لحبة العنب
راح تدور ويّه أفلاك برّه الزمن
راح تشوف : كيف يصير
هذا الكون
( كانون الأول / 2006 – الشارقة )
(( جنون ))
————-
مثل الآه …
خصرك ناحل … وكلش طويل
إشكثر … مثل الآه
إي والله …
وألله …
اللي تعب بي جم سنه وسوّاه
من شافه بهت
ومن الفرح ، مجنون صاح :
إشكد حلو هذا الخصر …. ألله … يا ألله !!!!!
( كانون الأول / 1993 – الشام )

 

شاهد أيضاً

أبوذيّه وعتاب من الشعر الشعبي العراقي
(الى الأخ الشاعر العراقي سلمان داود محمّد أخي وزميلي في الوطن والأدب)
كريم الأسدي ـ برلين

أبوذيّه وعتاب من الشعر الشعبي العراقي كريم الأسدي ـ برلين اهداء : الى الأخ الشاعر …

* مـن يـوميّـات ســاحـــة التحــرير : القسم 4
أغــــاني المجــــــد لشــــهداء” ســــاحـة الخُــــلاّني ”
د.خيرالله سعــــيد
(أدب ثورة تشرين)

* مـن يـوميّـات ســاحـــة التحــرير : القسم 4 أغــــاني المجــــــد لشــــهداء” ســــاحـة الخُــــلاّني ” د.خيرالله …

أمير الفتلاوي : صبرنه هواي كافي بيا بخت ننهان

صبرنه هواي كافي بيا بخت ننهان أمير الفتلاوي صبرنه هواي كافي بيا بخت ننهان من …

تعليق واحد

  1. اجدت يا ابا علي وانت تنشر النموذج الرائع والمتسم برقي الروح والمعرفة الحبيب ابا جنوب

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *