جبار عودة الخطاط : وصية أم من الناصرية (دمع أسمر)

 
 
 
هيج
وإسچن
اصرخ.. إصفن
وإنشتل
بالصبخة خضّر
 
واشتعل
واطفي 
وتقدّم…….. 
لا بعد أمّك تأخر! 
 
وإركز
إركز
واركد وفز
ونيشن بگلبك وصوّر
 
گوم دوّر 
عن وطنٍ تايه بغابة
لملم رمادك
تطشّر
 
طير 
وكّر
ولو لفاك التعب
إغفه بحضن غيمة
وانتبه يابعد شيبي
عيونهم رادار يفتر
 
وشيل راسك
طخ نجم صبحك بگصتك
وانزل
إصعد
واِلّبد بظلك تكتّر
 
إصحه لو غيّمت ربعك
امطر وخل يروَ زرعك
إطوي دربك 
لاتفرشه
وشيله لو دربك تعثّر
 
ولو شفت رمل الرِدي 
بيّس بگاعك
تمدّد بطولك النشمي
وصير نهرك
وشيّم إجدامك وأعبر
 
وبالك تعد النجم
لو ليلك المغتاض غنّتب
النجم شيب 
بشعر حزنك يخيّم
من تعدّه يگوم يكثر
 
وخلي خدّك نار كبرة
تبخّر دموعك الخشنة
وابچي
إبچي
الزلمة من يبچي يتطهر
 
ولا تخلّي الدمع يلمع
ظلّله بدخان صدرك
دمع مثلك.. 
دمّه حنطي
دمع مثل وليدي أسمر
 
وخيّط عيونك وسدها
وروف جفنك
بشعر رمشك
لو شفت دمعك تماده
وگام يمطر
 
تعليقات الفيسبوك

شاهد أيضاً

| يحيى السماوي : خـمـسُ مسودات لمشروع قصائد .

مـا حـيـلـتـي؟ حُـزنـي وَلـودٌ  .. والـمَـسَـرَّةُ عـاقِـرةْ ـــــــــــــــــــــــــــــــــــــــــــــــــــــــــ (1) ليلة في صحراء يـقـتـادُنـي نـحـوي سـؤالٌ …

| صفاء ابو خضرة : سيرة الموت .

  قالَ لي: أعرفُ ما لا تعرفُ، وأقفُ بجنبات الحُلْمِ،  أضيءُ ظلكَ يحْبِكُ صورتكَ،  أراكَ …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *