وصاية
عبد اللطيف رعري/ونتبولي/فرنسا

قرب قرب

قرقب الناب…

مع لصحاب مع لحباب

مع لعدو لخان وغاب

حلي لوناسة وعمق شروط المحبة بلا حساب

روج الكلام بلمعاني..

سرد لحكاية من بداها وترجى نهاها

فالبر فالبحر فثلث الخالي

كون فيها بطل

دير راسك طرف منها

كون لسانها واروي حالها

كون فيها الخير والشر

وفرض حكامها

كون حروفها وعري لمشابكة فخيوطها

وصادف العادي بالبادي

ورقق لوزان

وخلي الكفة ميّالة فطريق الخيال الصادق

تصير الفراجة حبل لكْمال

وتزهى لمشاهد لطِّي النسيان

وتبان الرجاحة ومراتب العقول

فكل وجبة بها انسان يعانق انسان

كون بوابها

وخرج سلطان عل عبادها

كتمايل بحيالة لقصر

وتسلغى لخبارها

كون فيها الصخرة الصامدة

وسجل عليها عقادها

حتى يزورك لحكيم فصفة هبيل

ويجعل سبوبك قوامها .كون

واحد من ناسها

واحبك لدوار

لا تدِّي لا تجيب فلخبار

حتى تتأكد من حضارها

والزم الصمت حتى تعرف وصادها

راه اللسان الطويل يشعل نارها

وينشر رمادها

وتسير لحكاية عوافي وشكون يطفي لهابها؟

قرب قرب

قرقب الناب

خليكْ قصيدة مزجلَّة برواع لقوالْ

خليكْ موّالْ…

أفَيَّقْ السَّاكن بسر البحَّةْ,

خليك لوحة فنان تجدبْ بلوانك

والشُّوفة فيها عبارْ للروحْ

فزهاك زاهيةْ

وفقساوةْ الحالْ عليك

تلقاها سَلوةْ رَايقةْ مادَّة بْصَارْها للعالِي

وتقول…

يا لمخمم فسراري والحاير فلواني

انأ صنيعة بهالي

مالكني الحال بحوالو…

.أنا مترجم لحكام واللغاز وليتْقوَّل بقْوالُو …

أنا الهِمان فكل مكان

والمهموم نداري بحالتو…

خليك كتاب مْسفَّرْ بفعالك …

طاوياك حاكمة لعقولْ

ومالكة الكلمة بالسر المنقولْ

ذيكْ السّْجِيَّة الناطقة بلسان الكونْ …

وفكل ضيقْ ضاحكةْ ومبَّسْمةْ للرَّاسْ المفتُونْ ..

خليك قطرة ماء تروي بها عطش خلانك

ملي تجيح الساقية ….

وتجري الشعبة بلحجر

ولخضر من أعشابنا اصير اصفر

واللي هزم ومَاتْلاَ ينفعْ معاهْ صبرْ….

والِّليعَكَّز وتقهرْ…

ولجفاه الليل وهجرانْ لخليلةْ وبالكيَّةْ تَّدبَرْ …

واللِّي تَّلاَتْ بهْ تحتْ حِيطانْ لقْبيلَةْ

وقلْ النّْظَرْ ….

ولفضح سرارو من الصغر..

لطايشة عجوز تفتل الزهر

بقوافي مرمدها إبليس بالطوب والحجر …

ولسكن عشاش الغابة ومسبتو غدر…

بعد ما كان بيتُ قصر …

وكان فيه الغادي والجاي أكثر من حبات لمطر …

خليليك وردة فايحة بين زهارك….

كلْمَا جَا الرّيحْ أجيبْ خبارَكْ

وأنت رقَّاسة بين كفوف محنية بلمانْ

ولا من ينظم شعارك….

ونْسَايمْ عشقك القمري

ولونك الخمري

وتاج الزِّين الفطري….عليك شاهدة

خليك شمعة تكدي فظلامكْ …

وتبكِّي الغيرْ فحلامكْ

وتباتِي شادَّة العِيطْ فهذابكْ …

خليك ميزان أعبر شعارك

وكفاتو مساوية بحب الخير…

خليك صبية مرَّصْعة صبعانك…

بخواتم حجارها لمَّاعَة…

واجْبة لِيكْ لمْبَايْعةْ واجبة ليك الطَّاعَةْ …

وقوفك بالصلاة على الزِّين الزِّين

وفمشَاك الله الله عليك الزين….

كتانة حرة من حرير الدودة

لدّْين عليك ممدودة….

ولطيار شَاديةْ غرُّودةْ …

تاج راسك ذهبي مزرقط باللويز

لشافك يركع ويفهم التمييز.

.وأنت لخليلة

عبد اللطيف رعري/ونتبولي/فرنسا

شاهد أيضاً

نايف عبوش: الحنين إلى الماضي في ثقافتنا الشعبية .. متلازمة فرط استذكار أم تواصل عضوي مع جذور النشأة

توصف الثقافة العربية التقليدية بأنها ثقافة طللية من الجاهلية إلى اليوم.ولكن ذلك قد لا يعني …

هاذ الصبر لاش
عبد اللطيف رعري:فرنسا

اييهْ يا حَالي واشْ مصبَّرني .. وهاذ الصبرْ لاشْ؟ علهَاذ الهَّم الهَوَّالْ وَلدْ لهوَّاليةْ.. الحَاسبْ …

شاعر المليون: قصائد تمجد الأخت والأم وعبق المكان
أبو ظبي: عدنان حسين أحمد

تهدف مسابقة “شاعر المليون” إلى صون التراث الشعبي الإماراتي خاصة والخليجي بشكل عام. ويُعدّ الشعر …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *