الناقد العراقي اول موقع عراقي مختص بالنقد
عليك الله يملك الموت
خلود الحسناوي-بغداد
عليك الله يملك الموت
__________________
عليك الله يملك الموت
روح ولاترد يمنه
ذرانا الوكت
خلانا طشار
لاحب ،
لاوفى واخلاص ليلمنه
صفينا اغراب
بوطنا ولا شبر النه
ووكت الموت يتوزع علينا وبالتساوي
يخاف يظلمنه !!
لاوطن عندي ولاسكن
لا ناس
بس الهم صفالي وانتظر منّه
من اي دولة
لومن واحدن ميسور:
مهجرنازح ومحزون
خل يتفضل بسدنا
باجر ضاع ..
الناس ضباع ..
ظلم تهجير ناس مشردة وفتنة
عليك الله يملك الموت
عوف الطفل بيد امه
ولاتحرم شباب مهندم ومزيون
من حلمه ..
تعبنه هواي
مامرت سنة اذا مو كلنا بالحزمة
اللي خاله راح بمعركة
وراح اخوه انعدم بالتقرير
واللي راح بالشط ماعرف وضعـــه ..
لاجثة ولا وصل رسمه ..
سوالفنا جثيرة وماتكفي ليال
اذا سولفنا ..
مو ضعنا ..
تيهنا الدرب وتاهت وراه احلام
صفت بس السوالف
غيرها شعدنا
راحت ناس .. بالتفجير
وراحت ناس .. بالتهجير
لاالنه سكف لاخيمة لتلمنه ..
تعبنا ياوطن وانت الحضنت اغراب
حبيناك ؟؟ لو ورطة تورطنه ؟!!!.
ورطـــــة
