موفّق محمّد : ميّت أنه ( في رثاء ولده الشهيد)

ميّت أنه
ولا خط يجي عن موتك
سوده وحشتك يَولِدي حرموك من تابوتك
مشجوله ذمته المرمرك
لا تبري ذمته مروتك
ما ناح طير على الشجر
إلّا اعله نغمة صوتك
————————
حيل ادلهمت يا نبع ﮔلبي وﮔمرنه امدمّه
إبموس الخناجر تاكل بلحمه وتفطر النجمه
عميه وتدور رويحتي إبيابير أدوّر يمّه
وما ظِن بعد تطلع شمس وتزول هاي الغمّه
وفرﮔاك فتّ إمرارتي وضاﮔت عليّه الـﭽلمه
لا ﮔبر وتهدّل إله
وألهم ترابه وأسأله
الـﮔلب صاير كربله (كربلاء)
ولا خط يجي عن موتك
————————-
يتنفس بشفته الورد والنجم غافي برمشه
هد حيلي موتك يا حلم يبّس الطير إبعشّه
إنـﭽان متّ بلا ﮔبر آني ﮔبر يتمشّه
بلـﭼن تفِز إرويحتك يوم وتطير الوحشه
وألـﮕاك أقفلك بالرحم وأنطيهم إذن الطرشه
ما رد حلم عايف هله
وصدره تراب ومنقله
الـﮔلب صاير كربله
ولا خط يجي عن موتك
—————————
وما تخلص إﮔبور البلد دفّان ينخه إبدفّان
ومشلّه اشليله الشفل ويطمها عدله الشبّان
يا ريت ما شفتك ولا هلهلت يمّه النسوان
يصل عظمك إبسنّ الشفل وتاكل إبعيني الغربان
وأوﮔع وتلّ إرويحتي وأﭽبّح إعله البيبان
ما رد حلم عايف هله
ولا طير يعرف واسأله
الـﮕلب صاير كربله
ولا خط يجي عن موتك

تعليقات الفيسبوك

شاهد أيضاً

| نايف عبوش : الشعر الشعبي..بين النظم باللهجة العامية والانسلال المتناغم عن الفصحى .

الشعر الشعبي، هو ذلك النمط من الشعر الذي ينظم باللهجة العامية المحكية المتداولة بين الناس …

| د.خير الله سعيد : مـــــا أخـــذلـك والـــنـــبي

  226- مـــــا أخـــذلـك والـــنـــبي ،،،،، لـــــو وُجَــــب قَـــتــلـي وحَــــــق واســعـــى الـى شـــوفِــتــك ،،،،، لَـمّــــــن …

اترك تعليقاً

لن يتم نشر عنوان بريدك الإلكتروني.