موفق محمد : مخدّتنه عصافير !

mowaffaq mohammadمخدّتنه عصافير
تِزقزق بوسةْ بوسةْ إتطير
وعلى طولك ورد يِضحك نِدَهْ ونجوم
وضوه يلبط
متلحك تِسمعه العين
وأنا إِزنيكي خصر غافي فِتر ومزاعل
الردفين
أكَيسه إمنين ؟
من أتعب وغمض العين
وأريد أشبع حسن متلحّك عيوني
من أسولف ويّه خصرك
تتعب إظنوني
وحلو إخبالي عليك إيفضِض الراس
إذا وسواس يتعب ينخه وسواس
يلماشي فوك الرمش
خاف الرمش يجرحك
مَديت كلبي إلك
فأسري إعلى طوله مَلك
وسمّعْني مِزنة ضوه
سمّعْني
سمّعْني
والزمني خل ألزمك
وأرد أنهزم مني

********
مخدّتنه عصافير
وعلى صدرك مري إينثن عطر
ويلمّن المكتوم
وأبدكلك وأنه المالوم
وأريد أشبع حِسن متلحّك عيوني
من أسولف ويه طولك تجدح
عيوني
سنابل تشتعل وترف على الصوبين
ورد يعصر ورد ويكحّل النهدين
وأنا أزنيكي خصر غافي فِتر
وأتخبّل.. أكَيسه إمنين
من أتعب وغمض العين
ولم كل العسل وأغسلّك بإيدي
ونَشفك بوس
وضملك بالأصابع رازقي وقداح
وافرشلك ورد جوري
ولم روحي نِدَهْ يلالي على جفونك
وظل أبدك ولوليلك
واريد أشبع حسن متلحك عيوني
من أمد إيدي على شعرك تجفل
إمتوني

**********
مخدتنه عصافير
ونفانيفك حَمام من أمد إيدي يطير
ولك شيصير ؟
لو مزنة ضِوه وتكحل إجفوني
وبوسك حيل بعيوني
ويجيني من الكصايب هيل
ليل إيسيّر على الليل
ومن بوسه تصير الصرّة نجم سهيل
ولم بيدي ضواها وروحي ترجف حيل
ترجف حيل
دفيهه تره من الكيظ بردانه
وآنه المستحي والروح غركانه
وألف سباحه طولك لاكن إشبيدي
من أمد إيدي
تكلي أغرك يلمعيدي

********
مخدتنه عصافير
ونجمه إتبوس نجمه وتاهت إعيوني
وأنه إظنوني ربابه تغني بيهه الريح
وتُطر بيّه الوساوس طَر
وأنه بلا حيل وأتمرمر
وألملم بيّه واتوجه على جنوني
وحلو إخبالي عليك إيشيب الراس
إذا وسواس يتعب ينخه وسواس
ضَيعني فِتر خصرك
لا .. سكرني وغفيت أبغيمه نعسانه
تين إيسير على التين
وغزلان وفخاتي وشفّة قمر الدين
ومن تمشين
تظل كل البلابل تقره من تمشين
يلماشي فوك الرمش خاف الرمش يجرحك
مديت كلبي إلك
فأسري إعلى طوله ملك
وسمعني مزنة ضوه
سمعني
سمعني
وإلزمني خل ألزمك
وأرد إنهزم مني

*********

شاهد أيضاً

أحمد إبراهيم الدسوقى: الواد صبيحة ابن الفرطوس

الواد صبيحة فلاح كفر الاصول ابن الفرطوس …………………………………………. ساب الزراعة وراح عــ القاهرة طمعان فــ …

عن تدوين شعر العامية العراقى المعاصر
محمد على عزب ـ شاعر وناقد مصرى

اٍن شعر العامية العراقى المعاصر الذى نُشَرت أولى قصائده سنة 1960م يختلف فى تقييده, وتدوينه …

أحمد إبراهيم الدسوقى: طارت فى الهوا أخلاقى

طارت فـ الهوا أخلاقــــــــــى                        …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *