ناظم السماوي : سالفة وطن ؛ للحزب. والوطن. والناس (ملف/3)

nadum alsamawi 3إشارة :
والشاعر الكبير “ناظم السماوي” يمر بمحنته الصحية ، لا يسع أسرة موقع الناقد العراقي إلّا أن تتمنى لهذه القامة الإبداعية الكبيرة .. نخلة الشعر العامي ، النهوض والشفاء العاجل والعودة إلى ميدان الإبداع . وتحية له ولمسيرته الرائعة الثرة ، تبدأ أسرة الموقع بنشر حلقات هذا الملف .

القصيدة :
يا طبيبي اصواب دلالي كلف..
لا تلچمه إبحطة السماعه…
آنه گلبي اويه الوطن ما يختلف!!.
بالدقايق والثواني او ساعه..
– – – –
يا طبيبي خيمتك خيمة شفاء..
تبقه جوال الشعبهه بالوفاء..
يا طبيبي الحزب علمنه الولاء..
للشعب والحزب هاي اطباعه
– – – –
يا طبيبي احنه علمنه فهد..
للحزب والناس وفاية عهد..
الخيمه لو طاحت تطيح إمن العمد
واحنه خيمتنه الشعب وذراعه..
– – – –
يا طبيبي للشعب أحنه خدم..
الناس گالتهه صدگ نكتب نعم!!.
احنه چاكوچ لحزبنه واحنه منجل للعلم..
والسفينة الحزب واحنه اشراعه..
– – – –
يا حزبنه يا فكر يا هندسه..
يا صُباح العافيه وأحله مسه..
يا حزبنه ايعيش فهد الأسسه..
إنذوب بسمه كلنه إله فزاعه..
– – – –
يا طبيبي يا شيوعي يا نظيف!!
ليش گلي هالحزب باقي عفيف؟.
او ليش چفه للشعب ورده او رغيف؟.
وليش كل اشطوطه حُب رضّاعه..؟
– – – –
يا طبيبي  گوم داوي أهل الفساد
ذوله اكبر مرض نازل عالعباد
يا طبيبي بهل الوطن يكفي الحياد
يا طبيبي إمنين هل طرگاعه
– – – –
يا طبيبي ابيوتنه خيمه إلك
انته من عدنه طبيبي، أحنه هلك
يا طبيبي كل حچي الدوله كلك
والشعب سووه فقط شماعه!!.
– – – –
يا طبيبي المرض بس عدنه يزيد..
والعلاج الموضعي لا ما يفيد
يا طبيبي اوداعتك كله يزيد..
امنين ما تلتفت تلگه اتباعه..
– – – –
يا طبيبي الطفل عاف المدرسه..
وخبزته بالهم طبيبي إمغمسه..
ايشوف ابن مسؤول جوگه تحرسه..
القاط فله القندره لماعه..
– – – –
يا طبيبي اصوابنه كلش صعب..
احتيال وبوگ والباقي نهب!!.
يا شعب گلي اشوكت ليمته تهب؟.
والشعب چا وين گلي اسباعه؟.
– – – –
يا طبيبي اوداعتك كلشي إنكشف!!.
والحرامي الباگ حته اسمه انعرف..
ترس بيته اشكال أنواع التحف..
والشعب حصته الفگر بانواعه!!.
– – – –
يا طبيبي يا شيوعي يا أصيل..
من تزور ابيوتنه اتشافي العليل..
انته بخلاق الحزب طبعك دليل!!.
ومن تودعنه اشحلاته اوداعه.
– – – –
يا طبيبي المرض عدنه ما يطيب..
لو تخلي اگبال كل واحد طبيب.
المرض من ناس تاخذ ما تجيب!!.
والشعب خلوه مثل خراعه..
– – – –
يا طبيبي الناس عرفوهه غلط..
الدين بالفرهود والسبحه انخلط..
يا طبيبي النفط بالجيب إنشفط
او بقوا اهموم الشعب تجواعه!!.
– – – –
يا طبيبي الناس كلهه هاجرت
ومن مواعيد الدوّيله أيست
يا وزارة گلي خدمه قدمت؟.
بس عناوين وخطط خداعه..

– – – –
يا طبيبي الشعب بس رايد ستر
ايريد يسكن بيت حته لو شبر.
يا طبيبي الوضع عدنه يستقر؟.
لو بعد انگس تصير اوضاعه؟.
– – – –
يا طبيبي الناس كلهه امدوهنه.
نص تجدي او نص طبيبي إمسودنه
يا طبيبي .. النخل حزنان إنحنه!!.
او يمكن إيعوف الوطن وي گاعه
– – – –
يا طبيبي هل الشعب بلشه بلش..
المات گلي ايصير يمشي اويّه النعش
إقبض احسابك يشعبي من دبش
هاذه باگ الجدر والفرگاعه!!.
– – – –
يا طبيبي الوطن يمشي ليوره.
هاي قصه يا طبيبي امدستره.
احنه بالمگلوب هم نلزم سره؟.
لو نخلص الوطن من إضباعه.
– – – –
يا طبيبي يا شيوعي يا أنيق
انته لابناء الشعب أخ لو صديق!!.
إنته فراشه وّتشم.. ورد ورحيق!!.
ونرجس او جوري وعطر نعناعه!!.
– – – –
يا طبيبي هاذه حالي او قصتي
للقهر جيت احتفل وي خيمتي
يا طبيبي ارجوك تقبل وردتي!!.
اوياهه بوسه ابخدك اولا دلاعه!!.
– – –
يا شعب انتخب للحّبك صحيح!!.
هوه رايدلك وضع حتماً مريح…
اوضع علامة صح لبو حچي الصريح
هوّه أولهم بحقك داعه!!.
– – – –
يا طبيبي اصواب دلالي كلف
لا تلچمه ابحطة السماعه!!.
آنه گلبي اويه الشعب ما يختلف!!.
بالدقائق والثواني او ساعه.

تعليقات الفيسبوك

شاهد أيضاً

د. قصي الشيخ عسكر: نصوص (ملف/20)

بهارات (مهداة إلى صديقي الفنان ز.ش.) اغتنمناها فرصة ثمينة لا تعوّض حين غادر زميلنا الهندي …

لا كنز لهذا الولد سوى ضرورة الهوية
(سيدي قنصل بابل) رواية نبيل نوري
مقداد مسعود (ملف/6 الحلقة الأخيرة)

يتنوع عنف الدولة وأشده شراسة ً هو الدستور في بعض فقراته ِ،وحين تواصل الدولة تحصنها …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *