سعد صاحب : ملاك الشعر..

الى الشاعر الراحل علي الشباني
انته ملاك الشعر…،
والريح صارت فرس ،،
والخوف صار اجنود !
تمطر قوافي وصور ..،
وطش سعادة وفرح ،،
تنثر علينه ورود !
من جان وكتك صعب ..،
مايوم عفت الفكر ،
والناس هاي اشهود !
من صار خير ومطر …،
والخوف ذاك اندثر ..،،
وصبح أمان الزمن …
وصبح جبير العود !
موجود غيرك طلع …،
ونته التحب الوطن …
والناس ما موجود !!
انته علي وكل علي ..،
بالروح دوم يجود
يافارس اعله المهر ..،
مهر الوفه المحسود
يوصل صهيله السمه ،،
ويجفل البارود !
وانته اعله نفس الظهر ..،
رايات بيدك زرك ،،
رايات بيدك حمر …
رايات بيدك سود !
يعني انته لون الوطن …،
لون الوطن من دهر ،
غاب وصبح مفكود !!
وحنه عليك برهن …،
ندريك ما تنهزم …
ندريك ويه السرج ،،
ويه السرج مشدود !!
ويصيح عاشك وفي ..،
هلبة يجرح الهجر …
فد يوم تشفه صدك؟
فد يوم بينه تهود ! ؟
ويصيح ثاير شهم …،
مهما يطول السهر ،،
معدود نجم السمه ،،
نجم السمه معدود،،
أدهم مهركم هلي ،،
ميطيح نص الدرب …،،
وشما رمح ينطعن …
أكثر شجاعة يزود !!
ونعيش احنه برجه …
وشموع متوهجه …،
وكلوب بيها الصبر …
مات وصبح ممدود !!
جا ليش باب القهر …،
وكت الحزن منفتح ! ؟
وكت الفرح مسدود ؟؟
ألي يضحي وتعب …،
منسي وفلا ينذكر …،،
والتالي ذوله الاجو…
ألهم صفه العنكود !
راد الفلم ينتهي … ،
والنور وج واشتعل ،،
والصوت صاح اردود !!!
هاها يجرحه الكلب،،
هاها يأسرى الفقر ،
ها يازند حاصود !!
صفكوا أجانه البطل …، وبكصته ولله النصر ،،
ولله النصر معكود !
حسن الشموس الاجه مدري الاجه من السفر ،،
غايب هلي الموعود !!
حجام مدري حرز … ،
مدري صلاح الحفر …
بيده نفق بالسجن ،،
مدري الاجانه الفجر .. ،
وجه الحبيب سعود !؟!
ونته التحب السمر …
ونته التحب الشكر …،
والعيب حبك طفح … ،
ماخله جف وأثر ،،
ماخله كل احدود !!
تستاهل انته الرتب … ،يلي طويت المحن ،،
يلي لويت زنود !
تستاهل انته المجد ،،
يلرايتك بيضه … ،
تنزل أشوف البشر …
ونته جنت صاعود !
تستاهل انته تحط ،،
نجمات فوك الجتف … ،
نجمات من الذهب …
مومن خرك وجرود !!
وشما علينه تمر … ،
يا خذ تحية الك ،،
طابوك هذا الصرح …
والهامش المطرود !
واليوم يا بوصمد … ،
اتلفت وما تصح …
وبصفي وادم غرب ،،
بنغال مدري هنود !
واليوم يا بو صمد …،
أتلفت وما تصح …
ودموع ربعك بحر ،
يهدم جثيره اسدود !
واليوم يا بو صمد … ،
جثه بهذاك الكبر ،،
لكن يخاف النمل …
منها ويخاف الدود !!

تعليقات الفيسبوك

شاهد أيضاً

د. قصي الشيخ عسكر: نصوص (ملف/20)

بهارات (مهداة إلى صديقي الفنان ز.ش.) اغتنمناها فرصة ثمينة لا تعوّض حين غادر زميلنا الهندي …

لا كنز لهذا الولد سوى ضرورة الهوية
(سيدي قنصل بابل) رواية نبيل نوري
مقداد مسعود (ملف/6 الحلقة الأخيرة)

يتنوع عنف الدولة وأشده شراسة ً هو الدستور في بعض فقراته ِ،وحين تواصل الدولة تحصنها …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *