الرئيسية » ادب عامي » وداع الحلو.. كاظم إسماعيل الكاطع يرثي زوجته “أم وسام”

وداع الحلو.. كاظم إسماعيل الكاطع يرثي زوجته “أم وسام”

ودّعناج
ووداع الحلو يكلف
وزتينه النعش بدموع
من ديارنة لحد النجف الاشرف
بوداعج وكفنة اصفوف
وجان الكلب باول صف
شفة تعظ ندم عالراح
وجف ايذب حركته
وينكسر بالجف
لان شحة نساء ابهلوكت تدرين
من نفكد المثلك
والله نتاسف
لان شحة كرم واخلاق
وتخاف العطاشة اعله النهر ينشف
صفنات وجمر عالايد
ونلف الحزن مثل الجكاير لف
الدهر ثكل علينه اهواي
ثكل والحمل ما خف
صلف كل ما يضعف الروح
يترهة ويصير اصلف
ولو اهلي وهلج
وسوالف الايام
ما صارت اتراب برف
هلي لو حاولو بالماي
بينه الماي يتنظف
هلي لو حاولوا بالنار
بيت النار جنة بثلج يتسكف
عهد نبقه حزانه
اعليج
ويتعاتب عليج البيرغ
المارف
روحي مودعه بالله
بيتج يم علي الكرار
يم والد شهيد الطف

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *