تابعنا على فيسبوك وتويتر

saheb aldhoiriيا حبيّب لو رِدت باڇر تشيل
وماتصيرش بَس نگول إحنه ولّوْ
ڇنِت احشّم كل عمامي عله الرحيل
ومايهمني اللّي إجوا والما إجوْ

ياحبيّب لو گلتْ آنه زعلانْ
چا زعلتْ عله الهِوه لو زَعّلاكْ
وما يمر بريّتي وذاك المـچـانْ
اللي گبلْ ماشِمْ هواه أشتمْ هِواكْ
وچفّي لِگطه الگاك بدروُب الزمانْ
وكيفّيت إبّين ضلعَين ازرعاكْ
الدنيه مَدري شلوُن فُرشتلي الشليل
وفرهِدِيتكْ يوُم عذالي التهَوْ
وآنه جِبت الغانِمه وآنه الدليل
چوّرت وأهل الهَوه ما حَصّلوْ

***********************
تعَلّـگوّ يَرفاگتي بالطيّباتْ
وخلّو إدروب الرِدَه لَهل الرِده
اليباتْ عله الهَضُم خلّه يباتْ
الغِيره مُهره وماتظل محدّده
دُوك دير إعنانها علّه النايباتْ
وفوت گوه علّه الخَطر وتعمِدّه
هاي هِيه ومن تـِگـع بيهَه چتيل
هاي هِيه وصير للرّحه لهوْ
چفةْ الميزان تثگل بالثجيل
وهاي دِنيه ومو شَرِط بيهَه العِلوْ

********************
إي وحـگك وانته آعز من اليَمِيْن
ولو حَلِفتْ بَغَير ماگتلَك ڇذوبْ
آنه وانته وما علّي بالعالمين
الشرِّگت والغرّبت بينه الدروُبْ
وهَسّه عَتني الشوگ يَمّك والحنين
إستاحَشِت چـي وحّدي وكت الغرُوب
كون يَمّك چـا صحِتْ عِندَكْ دخيل
دولبنّي أيام هجرانك شَسَوْ ؟ !
وانته تدري بمهجتك (صاحب) نزيل
وخاف غيري بالنِزِل بويه إدّعو !

************************

مِنْ زمان دياركم تشـچـي الظلامْ
وهَل نِثرْنه إعيوننه عليهَه نُجُومْ
وانته تدري اطباعنه اطباع الحمامْ
مِنْ يتيهْ يظلْ عله دياره يحُومْ
وهَالدِوَت بكتاركم نار الغرام
وما يطفيّها و ” عَلِيْ ” مَلكْ الغيُوم
بَسْ رِضابَك يا حلو مِثل الجِحِيل
لنار گلبي كون موگد اوگِدوْ
وآنه احبَنْ بيك كلْ ما هو جميل
وما علينه بالحـِچو والما حـِچوْ

***********************

يا شريڇ الرُوح خَلهُم شِيْحَـچون
وما علينه بالعَرَف روحَه نشِيط
ولو درَوا واللّه باچرْ ينتهون
صاحو بغربانهم ييزي النغيِط
وآنه ما ريدَك تفكْ عَني الديوُن
ولا أريدك لو گُرَب مَوتي محيطْ
آنه موتك ضايـگـه وچن سَلسَبيل
ومِنْ منايه الخالجَكْ شارب حِسَوْ
عَيب أذل وداعتك واصبح ذليل
يومْ أشوفن بالنزِل غيَري ادّعوْ
عاد أحشمْ كل عمامي علَه الرحيل
وما يهمني اللي إجَو والما إجَوْ

***************************

*القصيدة مُرسلة من الأستاذ أحمد معن الزيادي فشكراً له. 


ملاحظة : الآراء الواردة في النصوص والمقالات لا تعبر بالضرورة عن رأي الموقع.

شاهد جميع مقالات
بواسطة :

مقالات ذات صلة

التعليقات

إكتب تعليقك

إسمك الكريم * رابط موقعك "اتركه فارغا اذا لم تمتلك واحداً"